Il concern d’armaziun tudestg “Rheinmetall” negoziescha actualmain davart la producziun d’ina fabrica da panzers en il pajais. Quai ha confermà il schef da “Rheinmetall”, Armin Papperger, en in’intevista cun la gasetta “Rheinische Post”. La fabrica custass radund 200 milliuns euros e pudess producir fin a 400 panzers da cumbat per onn.
Plinavant ha declerà il schef da “Rheinmetall” ch’ina tala fabrica pudess vegnir protegida cun in sistem da defensiun cunter aviuns cunter attatgas russas ord l’aria. Ils discurs cun la regenza a Kiev sajan buns, uschia Papperger vinavant. El speria ch’i dettia ils proxims dus mais ina decisiun en chaussa.
Il concern d'armaziun crescha fermamain en il mument. Dapi il cumenzament da la guerra en l'Ucraina è il curs da la bursa pli che dublegià. Oz ha il concern perquai dumagnà il pass en il DAX, l'index dad aczias cun ils pli gronds concerns tudestgs.