Update Ucraina - UE prolunghescha sancziuns cunter la Russia
Ils 24 da favrer 2022 ha la Russia cumenzà l’invasiun militara da l’Ucraina. Tenor la Russia saja quai ina reacziun sin il privel tras la NATO. Ils pajais dal vest han crititgà l'attatga e sustegnan l’Ucraina en pliras furmas. Dapi lura furiescha ina guerra en l’Ucraina cun blers fugitivs.
Quest ticker dals eveniments en la guerra tranter l'Ucraina e la Russia na vegn betg pli actualisà. Tut las novitads davart la guerra vegnan be pli en noss ticker da novitads quotidian.
27 da schaner
L'Uniun europeica ha prolungà las sancziuns encunter la Russia per sis ulteriurs mais. Quai han decis las ministras ed ils ministers da l'exteriur dals 27 stadis da l'UE. Uschia vegnia vinavant refusà a Moscau entradas per finanziar sia guerra, scriva Kaja Kallas, l'incumbensadra per l'exteriur da l'UE. Tar las sancziuns tutga in scumond da commerzi sco era mesiras per bloccar facultad da la Banca naziunala russa. Ordavant veva l'Ungaria mess en il veto encunter la prolungaziun. Entant ha il pajais però dà si sia bloccada. Sco cuntramesira survegn l'Ungaria garanzias tar il tema segirezza d'energia.
15 da schaner
L'Ucraina ha danovamain rapportà d'attatgas massivas ord l'aria da la Russia. Tenor medias ucranaisas hai dà oz en damaun alarm d'aria en l'entir pajais. La Russia haja tranter auter sajettà passa 40 rachetas ed haja prendì en mira surtut l'infrastructura da gas ed auters implants d'energia. Quai scriva il president ucranais Wolodimir Selenski. Cunter 30 rachetas e passa 70 dronas haja la defensiun da l'aria pudì sa defender. Pliras regiuns ucranaisas n'han gì nagina forza electrica suenter las attatgas. Sch'igl ha dà blessadas u morts n'è anc betg enconuschent.
8 da schaner
L'Ucraina ha attatgà la citad Engels en Russia cun dronas, in depot d'ieli brischia. Quai scriva il guvernatur local. Engels è passa 500 kilometers davent dal cunfin cun l'Ucraina ed ha ina plazza aviatica militara impurtanta. Il ministeri da defensiun russ rapporta che 11 dronas ucranaisas sajan vegnidas sajettadas giu en il conturn dad Engels, 21 ulteriuras en autras regiuns russas. Las indicaziuns na pon betg vegnir verifitgadas independentamain.
6 da schaner
Truppas russas han surpiglià la citad strategicamain impurtanta da Kurachowe en l’ost da l’Ucraina, quai tenor indicaziuns dal ministeri da defensiun a Moscau. Cun quai saja vegnì conquistà la citad la pli gronda en il sidvest dal territori da Donbass, hai num en la communicaziun da pressa. «Suenter l’entrada da Kurachowe èn las forzas armadas russas penetradas en lieus da manevra libers.» Quai permettia d’augmentar il tempo tar la conquista d’ulteriurs territoris.
Il president da l'Ucraina Wolodimir Selenski vul bainbaud s'inscuntrar cun il president american Donald Trump per discutar davart ina pasch cun la Russia. Quai ha Selenski ditg en in podcast ch'è vegnì registrà il december e vegnì publitgà la dumengia. Trump ed el veglian chattar ina cunvegna e lura discutar cun la Russia, uschia Selenski en il discurs da trais uras. Decisiv sajan però las garanzias da segirezza dals Stadis Unids. E vinavant ha Selenski ditg che Trump haja la pussanza da sfurzar Putin ad ina pasch. Trump aveva declerà pliras giadas ch'el veglia sco president far ina fin a la guerra en l'Ucraina.
5 da schaner
En la regiun da Kursk en il vest da la Russia ha l'Ucraina cumenzà surprendentamain cun ina offensiva. Quai han las autoritats ucranaisas sco era russas confermà. Infurmaziuns detagliadas na datti dentant betg, omaduas varts proclameschan per sasez da dominar la situaziun.
L'Ucraina ha tenor rapports da medias da Kiew pers l'onn passà radund 3'600 kilometers quadrats da ses territori, quai è bun la mesadad dal chantun Grischun. La gronda part haja l'Ucraina pers il november cura ch'ils Russ hajan quasi mintga di conquistà 20 kilometers quadrats, rapporta in blog da militar, sa referind sin material da cartas dal militar. Ina conferma uffiziala dal dumber na datti però betg. Mez december aveva in chanal da telegram ucranais taxà la perdita dal terren ucranais sin bun 2'800 kilometers quadrats.
4 da schaner
L'eroport da la segund gronda citad russa Sankt Peterburg ha ad interim interrut il manaschi da sgol la bunura. Tut ils sgols e las partenzas sajan vegnids franads per radund 2,5 uras, communitgeschan las autoritads. I saja ì per garantir la segirezza dals aviuns civils. Indicaziuns pli exactas n'han las autoritads betg fatg. En il passà èn eroports russ vegnids serrads cura ch'igl existiva il privel per in'attatga cun dronas da l'Ucraina.
