Siglir tar il cuntegn

Header

Navigaziun

Camiuns sin autostrada.
Legenda: Fin il 2030 duain novs camiuns producir 30% damain emissiuns da CO2 che uss. Keystone
cuntegn

Exteriur UE decida limitas dad emissiuns er per camiuns

Per l'emprima giada ha l'Uniun Europeica dà ora er per camiuns finamiras liantas davart la protecziun dal clima. Novs models da camiuns duain avair fin il 2025 15% damain emissiuns da CO2 e fin il 2030 almain 30% damain che camiuns che vegnan construids ozendi. Constructurs da camiuns che n'adempleschan betg las novas finamiras ston quintar cun multas da plirs millis euros.

Perquai ch'adina dapli camiuns èn da viadi en Europa, chaschunan quels ozendi 25% dapli gas nuschaivels al clima ch'anc il 1990. Per franar il stgaudament dal clima ha la UE empermess en la cunvegna dal clima da Paris da reducir marcantamain las emissiuns da gas cun effect da serra.

Il parlament d'Europa ha la gievgia approvà las prescripziuns per camiuns concludidas il favrer cun ils pajas da l'UE. Uss dovri anc la votaziun formala dals pajais e lura pon las novas reglas ir en vigur.

RR novitads 15:00