Il president da la cumissiun da l'UE, Jean-Claude Juncker, ha pretendì avant il parlament europeic, che la Gronda Britannia ageschia. Els stoppian declerar uffizialmain la sortida da la Gronda Britannia da l'UE, e quai uschè spert sco pussaivel. L'Europa na possia betg sa prestar ina fasa da malsegirezza pli lunga.
Germania-Frantscha-Italia: Nagin tractament da preferenza pli
La Germania, la Frantscha e l'Italia pretendan era bainprest discurs davart ils detagls da la sortida da l'Uniun europeica. La Gronda Britannia na dastgia betg pli quintar cun in tractament da preferenza. La chanceliera tudestga Angela Merkel, il president da la Frantscha François Hollande ed il primminister talian Matteo Renzi vulan ch'i dettia contractivas cun la Gronda Britannia davart la sortida da l'UE.
Ils 3 politichers èn s'inscuntrads a Berlin, la saira avant il cumenzament da l'inscunter suprem da l'UE. Suenter l'inscunter ha Merkel ditg, ch'i na dettia nagins discurs cun la Gronda Britannia uschè ditg che lezza n'haja betg inoltrà la dumonda da sortir da l'UE.
Inscunter suprem a Brüssel
Ils schefs da stadi e regenza da l'UE sa cusseglian oz a Brüssel davart las consequenzas dal Brexit. A l'inscunter suprem da dus dis duai er vegnir preparà il terren per l'avegnir. Il president dal parlament da l'UE, Martin Schulz, ha entant engrazià en il parlament als collavuraturs britannics. Ils schefs da stadi e regenza vulan era animar il primminister britannic David Cameron da cumenzar uschè spert sco pussaivel las contractivas da sortir da l'Uniun europeica.
Nagin piclar rosinas pli per la Gronda Britannia
La chanceliera tudestga Angela Merkel ha entant suttastritgà ch'i na dettia nagin tractament da preferenza pli per la Gronda Britannia. L'Uniun europeica fetschia cleramain la differenza tranter stadis commembers e stadis terzs. La Gronda Britannia stoppia inoltrar sia dumonda da sortir senza ch'i dettia ordavant contractivas davart la relaziun futura cun l'UE.
RR novitads 06:00+
