Siglir tar il cuntegn

Exteriur UE lauda propostas da Grezia

En la crisa da la Grezia datti pitschens radis da speranza. Las novas propostas da la regenza Tsipras sajan ina buna basa per far in progress, ha ditg il president da la cumissiun da l'UE, Jean-Claude Juncker.

bandieras da la grezia e da l'ue
Legenda: Scleridas en la crisa da la Grezia - las propostas da la Grezia sajan ina buna basa. Keystone

La glista da propostas saja arrivada tar la cumissiun, sco er tar l’IWF e la Banca centrala europeica.

Questa saira cumenza l'inscunter extraordinari da l'UE. Senza resultat smanatscha a la Grezia en in'emna il bancrut statal e probabel era la sortida da la zona da l'euro. Malperinadad datti en spezial en connex cun reducir las rentas e d’auzar la taglia sin la plivalur. Duas pretensiuns dals crediturs.

Introducir drachma en cas da bancrut

En cas d'in bancrut stuess la Grezia probabel puspè introducir la nova drachma, in daner che vala pli pauc che l’euro. L’import (da medicaments, energia u victualias) vegniss pli char cun la drachma, la populaziun pli paupra.

70 % dals Grecs vulan evitar il Grexit

70 % da la populaziun grecca vul tenor ina retschertga represchentativa evitar il Grexit, pia evitar ina pussaivla extrada da la Grezia or da la zona da l’euro. Els fissan er pronts dad acceptar persuenter ulteriuras mesiras da spargn. Ina Grezia senza euro, fiss mender. Gliez muntass ina Grezia cun bancas serradas, ina che na po betg pli pajar or rentas e pajas, uschia ils quitads.

Entant ch'ils ins mantegnan er en quella situaziun ina tenuta fatalistica, emprovan auters uschè spert sco pussaivel da spendrar lur possess e van sin banca. Fin dumengia han Grecas e Grecs prendì giu da lur contos var 5 milliardas euros.