Siglir tar il cuntegn
Inhalt

Exteriur UE s'allontanescha da finamira da spargnar energia

Ils pajais da l'Uniun europeica han duvrà dapli energia, ed els s'allontaneschan da lur finamira da spargnar energia per il 2020. Quai annunzia l'autoritad da statistica Eurostat e sa basa sin las cifras dal 2016.

Purtret d'ina pumpa dad ieli en ils Stadis Unids.
Legenda: L'UE s'allontanescha da sia finamira da spargnar energia enfin il 2020. Keystone

L'UE ha la finamira da reducir fin il 2020 il consum d'energia per 20%. Il 2014 mancavan anc 1,7% per cuntanscher la finamira, il 2016 eran quai puspè 4%. Il consum d'energia primar è stà il 2014 tar 1'509 milliuns tonnas unitads d'ieli brut. Il 2016 è quest dumber creschì sin 1'543 milliuns tonnas. Finamira fin il 2020 fissan 1'483 milliuns tonnas.

Dapi il 2006 è vegnì fatg in pass enavant

La Germania, il pli grond consument d'energia da l'UE, ha reducì sia valur dapi il 2006 enfin il 2016 per 9,8%. En l'entira UE è il minus dentant stà anc in zic pli aut, numnadamain tar 10,8%.

Intgins pajais han sbassà dramaticamain lur consum d'energia. La Grezia per exempel mussa in minus da 23,6%. Er la Gronda Britannia è vegnida da sbassar ses consum per 17,8%.

RR novitads 16:00