Siglir tar il cuntegn

Header

gruppa da fugitivs e carabiniere a lampedusa
Legenda: La proposta per la quota per repartger ils fugitivs che vegnan en l'UE savens sur l'insla taliana Lampedusa ha gia opposiziun. Reuters
cuntegn

Exteriur UE vul testar repartiziun da fugitivs cun quotas

La cumissiun europeica ha decis da partir si ils proxims 2 onns en tut 20’000 fugitivs tenor ina clav da repartiziun. Il grond dumber duai la Germania prender si cun radund 18%.

Tenor la quota da la cumissiun europeica surpiglia la Germania 18%, suandada da la Frantscha e l’Italia. La grondezza dal pajais sco era la forza economica duain vegnir resguardads per mintgamai 40% tar la repartiziun da las persunas sin fugia, scriva la cumissiun da l’uniun europeica. Sper quai èn era il dumber da fugitivs gia acceptads e la quota da dischoccupaziun critieris en la clav da repartiziun.

Cun il dumber da 20'000 migrants vegn il test fatg cun in dumber relativ pitschen. En ils stadis da la cunvegna da Dublin vegn registrà plirs tschients millis migrants ad onn. L'onn 2014 per exempel èsi stà 600'000 migrants.

Proposta na vala betg per tuts

La proposta ch'ils stadis commembers da l'Uniun europeica han anc d'approvar preveda che la Gronda Britannia, l’Irlanda ed il Danemarc na ston betg sa participar al sistem da quotas. Las consequenzas per la Svizra n’èn anc betg conuschentas.

Opposiziun sa furma

Entant han la Gronda Britannia ed autras stadis commembers gia annunzià d'opponer a la proposta da la cumissiun. Tenor la ministra da l'intern britannica Theresa May fissia quai sco dischlocaziuns e domiciliaziuns sfurzadas per migrants tras l'entir'Europa. Quest agir carmalia anc dapli fugitivs e migrants en l'Europa, argumentescha May.

RR novitads 14:00

Artitgels legids il pli savens

Scrollar a sanestra Scrollar a dretga