Omaduas varts han stimà las bunas relaziuns bilateralas. Il president da la Confederaziun Ueli Maurer ha, guardà sin las frequentas visitas e la diversitad dals temas, discurrì d'in punct culminant istoric.
Discutà è vegnì davart extender la cunvegna da commerzi liber e d'ulteriurs pass per avrir il sectur da finanzas per la China. En vista als gieus olimpics ed ils gieus paralimpics d'enviern 2022 a Peking han las duas varts era discurrì davart ina collavuraziun tranter Svizra e China tar il sport d'enviern.
Decleraziun d'intenziun davart nova via da Saida
Plinavant han ils dus pajais suttascrit in «memorandum of understandig» (MoU) en connex cun l'iniziativa Belt and Road (BRI) che vul rinforzar la collavuraziun quai che pertutga investiziuns en projects da terzs pajais.
Cun la «nova via da Saida» vul la China investir milliardas en vias, vias sin rodaglias, ports ed auters projects d'infrastructura. Uschia vul ins construir novas vias da commerzi en l'Europa, Africa, America Latina ed en Asia. Ueli Maurer ha, tenor communicaziun, stimà il project grond da la China sco schanza per svilup, cumbat cunter la povradad e per la pasch. Ils blers pajais da l'UE ed ils Stadis Unids èn critics envers quest project. Pajais povers pudessan uschia crudar en ina trapla da debits.
RR novitads 08:00
