Siglir tar il cuntegn
Inhalt

Exteriur Uffants lavuran per nos handys e tablets

Per producir las batterias da laptops e smartphones dovri il mineral cobalt. Tenor Amnesty International vegn duvrà uffants per explotar quest mineral en il Congo. Ils producents ston garantir che quai na capitia betg pli, quai pretenda l'organisaziun per ils dretgs umans.

uffant african lavura en ina mina
Legenda: Intgins schaschinan per 1 u 2 dollars il di en ina mina da cobalt, tranter quests er uffants. Keystone

Per explotar quest mineral ston en il Congo millis dad uffants schaschinar, uschia Amnesty International. Blers uffants hajan be 7 onns e stoppian lavurar sut cundiziuns precaras e senza equipament da segirtad. Per ina paja da 1 fin 2 dollars per di èn els en privel da survegnir donns dal lom.

Congo è il pli grond furnitur da cobalt

Amnesty ha interrogà per ses rapport radund 90 lavurers en minieras pitschnas. Savens vegn chavà cun ils mauns u cun utensils primitivs. Las minieras furneschan en il Congo radund 20% da la producziun da cobalt. Quest mineral è impurtant per producir las battarias da litium. Passa la mesadad dal cobalt che vegn explotà en l'entir mund dervia dal Congo.

Ils fabricants refusan las inculpaziuns.

Tenor Amnesty na pon ils producents sco Apple, Samsung e Sony betg sclauder ch'els dovrian cobalt ch'è vegnì explotà d'uffants. Las interpresas refusan questas inculpaziuns.

Milliuns carstgauns profiteschan da la tecnologia nova, ma nagin dumonda co els vegnan producids.
Autur: Represchentant da AI(Amnesty International)

L'ovra d'agid da l'ONU ha stimà il 2014 che radund 40'000 uffants e minorens lavuran en las minieras en il sid dal Congo.

La regenza a Kinshasa refusa las renfatschas en il rapport da Amnesty. Quai saja sulet in tric d'auters pajais che produceschan cobalt, per pudair schlargiar lur cumpart al martgà, uschia ha declerà in pledader da la regenza.

RR novitads 6:00