En passa 10 pajais dal vest èn almain 169 uffants s’infectads cun hepatitis, cun raschun nunclera. Dus terzs dals cas sajan vegnids annunziads en la Gronda Britannia, communitgescha l’Organisaziun mundiala da la sanadad WHO. Il rest sa reparta sin plirs pajais europeics da la Norvegia fin la Rumenia, ed en ils Stadis Unids.
Anc bleras ensainas da dumonda
Tenor la WHO n’èsi anc betg cler sch’i dat propi dapli cas u sch’ins scuvria dapli cas perquai che l’attenziun per talas inflammaziuns dal gnirom saja pli gronda. Nagins dals uffants era infectà cun ils virus da hepatitis classics. En la regla è l’andament da hepatitis tar uffants tenor experts, savens senza sintoms u mo cun pitschnas incunvegnientschas. Tar blers dals uffants pertutgads uss, han ins registrà tenor l’Organisaziun mundiala da la sanadad valurs ferm autas d’encims da gnirom e mellania.
Ussa stoppian ins examinar sch’i dettia in connex cun la pandemia da corona, scriva la WHO. Hepatitis sco in effect secundar da las vaccinaziuns cunter corona excluda l’organisaziun, la gronda maioritad dals giuvens pazients da hepatitis na saja betg vaccinada.
