Siglir tar il cuntegn

Header

Navigaziun

purtret da pastiras ch'èn ruttas en lozza
Legenda: Suenter ch'il rempar era rut tar la mina Feijao en la Brasilia dal sidost è la lozza vegnida ed ha sutterrà plirs abitadis. Keystone
cuntegn

Exteriur Ulteriur alarm sistescha lavurs da salvament en mina brasiliana

En la Brasilia han las forzas da salvament interrut la tschertga da las unfrendas suenter la ruptura dal mir da serra.

Ins ristgia ch'in ulteriur mir dal concern da minieras pudessia rumper en il stadi federativ Minas Gerais. Plirs vitgs èn perquai vegnids evacuads. Medias brasilianas rapportan da 24'000 persunas ch'hajan stuì ir en segirezza. Radund 200 pumpiers e 13 helicopeters èn stads en acziun. Quai avevani fatg suenter ch'il manader da las minieras – la firma «Vale» – aveva mesirà nivels d'aua pli auts ed alarmà las autoritads.

Plirs morts suenter bova da lozza

Suenter la ruptura dal mir da serra sper ina mina da fier il venderdi aveva ina gigantica lavina da lozza sutterrà ina regiun abitada. Almain 37 persunas èn mortas – passa 200 persunas valan anc dumengia sco sparidas.

Raschuns anc betg enconuschentas

La raschun per l'accident saja anc nunenconuschenta, ha ditg il president da Vale Fábio Schvartsman. Tenor sias indicaziuns èn radund 12 milliuns meters cubics lozza sa derschids sur ils indrizs ed ils abitadis vischins.

RR novitdas 17:00