Tenor indicaziuns da la Corea dal Sid è ina rachetta vegnida sajettada davent da la chapitala Pjöngjang. Quella saja alura sgulada sur l’insla giapunaisa Hokkaido e silsuenter crudada en la mar. Quai communitgescha la regenza giapunaisa. Ils Stadis Unids e la Corea dal Sid han analisà la nova situaziun. La Corea dal Sid ha gia pretendì ina sesida d’urgenza da las Naziuns Unidas.
Avant curt aveva il Cussegl da segirezza da l’ONU ordinà ulteriuras sancziuns cunter il pajais isolà, tranter auter na dastga il pajais betg exportar textilias – il pli impurtant product ord la Corea dal Nord.
Segunda racheta sur il Giapun
Gia la fin d'avust aveva la Corea dal Nord sajettà ina racheta sur il Giapun. La regenza giapunaisas aveva valità quest ulteriur test sco smanatscha seriusa e gravanta. Perquai aveva pretendì il primminister Shinzo Abe ina sesida d’urgenza dal Cussegl da segirezza da l’ONU a New York. Il ministeri da l’extern da la China aveva admonì ch’il conflict cun il Giapun haja cuntanschi in «punct critic».
RR novitads 06:00