Tenor ils pumpiers sa tracti tar las 9 unfrendas da duas famiglias. Ils sfunsaders hajan chattà els la notg passada en ina chasa da campagna a Casteldaccia – radund 20 kilometers en l'ost da la capitala Palermo. Tras las grevas malauras en l'Italia era là in flum creschì rapidamain, rapportan medias talianas.
Nus essan pertutgads d'ina tragedia sgarschaivla.
Las autoritads èn consternadas. Tenor il burgamester da Casteldaccia Giovanni Di Giacinto n'era quest flum fin ussa anc mai stà privlus, rapporta l'agentura da novitads taliana Ansa.
En plirs lieus mancan aua da baiver ed electricitad
Uss èsi gia in'emna che vastas parts da l'Italia èn pertutgadas da plievgia intensiva, stemprads, urizis e vents da passa 180 kilometers l'ura. Il dumber dals morts è entant cler sur 20 persunas. En plirs lieus manca l'aua da baiver e l'electricitad. Era guauds e vias èn donnegiads da bovas. Pumpiers ed autras unitads da salvament èn en acziun gronda.
Adina puspè gartegia quai era da salvar persunas. A Montevago (radund 80 kilometers en il sidvest da Palermo) han ils pumpiers pudì salvar 14 persunas ch'eran bloccads en ina albiert tras il flum Belice.
RR novitads 06:00