Siglir tar il cuntegn

Header

purtret da Philip.
Legenda: Il princi Philip, l'um da la regina da la Gronda Britannia è mort en la vegliadetgna da 99 onns. Keystone
cuntegn

Um da la queen Prinzi Philip è mort

Prinzi Philip, il Duke of Edinburgh è mort en la vegliadetgna da 99 onns. El saja mort paschaivlamain oz a bun'ura en il Windsor Castle. Quai ha annunzià il Buckingham Palace.

Philip era vegnì operà avant in per emnas vid il cor ed ha suenter passentà pliras emnas en l'ospital. Mez mars era el lura turnà a chasa nua ch'el è mort. Il zercladur fiss el vegnì 100 onns vegl.

Il prinzi ha maridà il 1947, da quai temp anc la princessa Elisabeth, tschintg onns avant ch'ella è vegnida regina. El è stà il consort che ha servì il pli ditg en l'istorgia britannica, scriva la BBC. El era sa retratg cun 96 onns da ses uffizis. El ha valì sco il pli impurtant support per la Queen.

La queen ed il prinzi han gì ensemen quatter uffants (prinzi Charles, princessa Anne, prinzi Andrew e prinzi Edward) ed han total 8 biadis e biadias e 10 sutbiadias e sutbiadis.

Il prinzi Philip ha ils ultims onns adina puspè patì da divers problems da sanadad. Il cor ha fatg problems ad el ed er la vaschia. Plinavant ha el stuì vegnir operà vid la chanvella e cun 96 onns ha el anc survegnì ina nova giugadira dal chalun.

RTR novitads 14:00

Artitgels legids il pli savens

Scrollar a sanestra Scrollar a dretga