Siglir tar il cuntegn
Inhalt

Exteriur Um mazza 11 persunas en sinagoga a Pittsburgh

A Pittsburgh ha in um armà da 46 onns mazzà 11 persunas cun sajettar enturn en ina sinagoga. Quai ha communitgà Wendell Hissrich, il directur per la segirezza publica da la citad. Il delinquent probabel saja sa denunzià e saja vegnì arrestà, uschia ha communitgà la polizia.

policists ed ambulanza sin via
Legenda: Las forzas da salvament en acziun avant la sinagoga dal pumer da la vita a Pittsburgh. Keystone

Tar in attentat tar ina sinagoga a Pittsgurgh ha in um sajettà giu almain 4 persunas. Trais policists sajan blessads, rapportan la televisiun americana CNN ed emetturs locals. L'um ch'ha sajettà saja arrestà, rapportan las medias. La polizia ha entant confermà ch'i haja dà plirs morts e blessads, e ch'ina persuna suspectada saja arrestada. Betg cler è però, sch'igl è vegnì sajettà avant la sinagoga u en l'intern. Avant aveva la polizia circumdà la sinagoga en il quartier Squirrel Hill a Pittsburgh (Pennsylvania) ed avertì ils convischins.

Motiv dal delinquent nunenconuschent

Sco reacziuns han era autras regiuns en ils Stadis Unids rinforzà las mesiras da segirtad tar instituziuns gidieuas. Davart il motiv dal delinquent n'è anc enconuschent nagut. Sulet speculaziuns da las medias localas, senza confermas da vart uffizialas.

Trump reagescha senza cumpromiss

Il president dals Stadis Unids da l'America Donald Trump è sa mussà schoccà. Suenter avair appellà a la populaziun locala da sa tegnair protegids, ha el segirà l'agid da l'administraziun federala a las forzas localas a Pittsburgh.

Pli tard ha il president Trump pretendì sentenzias pli spertas a la paina da mort per assassins. Els duain propi pajar il pretsch ultimativ, ha Trump ditg tenor l'agentura da novitads tudestga dpa.

Congress mundial dals gedieus condemnescha

Ins saja schoccà dal sajettim tar la sinagoga en la metropola americana Pittsburgh – cun pliras unfrendas mortalas, ha ditg il president dal congress Ronald Lauder a New York. Quai na saja betg stà in'attatga sin ina cuminanza gidieua, mabain sin l'entir'America. Plinavant ha'l sincerà d'esser en patratg ed uraziun tar las unfrendas e lur plitier.

RR novitads 18:00