Exteriur - Ungaria: Dieschmillis demonstreschan per universitad
A Budapest han pliras dieschmilli persunas demonstrà per mantegnair la Central European University. Ina lescha nova planisada da la regenza da dretga da Victor Orban periclitescha l’universitad.
Ils demonstrants, ch’èn vegnids stimads d’in fotograf da l’agentura da novitads afp sin radund 60’000 persunas, demonstreschan per il mantegniment da la libertad academica. Ils organisaturs discurran da radund 80’000 demonstrants.
L’universitad è vegnida fundada il 1991 tras il milliardari american George Soros. Soros ha ragischs ungaraisas e vala sco criticher dad Orban.
