En l'Ungaria è il primminister Viktor Orban sa declerà sco victur da las elecziuns. Sia partida Fidesz ha pudì far la quarta giada en fila ina victoria electorala massiva. Tenor il resultat final provisoric, cun radund 98% da las vuschs dumbradas, cuntanscha la partida naziunalista da la dretga dad Orban ina cumpart da 53%. Per Victor Orban è quai la tschintgavla perioda d'uffizi.
Quai è in'enorma victoria. Ina victoria uschè enorma ch'ins la vesa da la glina ennà – però era da Brüssel ennà.
L'opposiziun ungaraisa a fatg 35% da las vuschs ed ha concedì la terrada. Demoralisà è sa mussà perquai il contrahent Peter Marki-Zay da l'Allianza da l'unitad. Experts quintan ussa che la partida Fidesz da Viktor Orban fetschia politica pli decisiva e confruntativa cun l'Uniun europeica, di il politolog Andras Biro-Nagy en la televisiun online «Partizan».
Posiziun turbla en la guerra en l'Ucraina
Actualmain planiseschan las instituziuns da l'UE da reducir u stritgar contribuziuns da promoziun per l'Ungaria. Quai sin basa dal suspect ch'ina part dals daners da promoziun da l'UE giajan en «chanals corrupts per sustegnair il 'sistem Orban'». Ultra da quai è Orban ils ultims onns s'unì cun il president Wladimir Putin – e n'ha fin ussa betg prendì posiziun fitg clera en connex cun la guerra da l'Ucraina.
