Passa 29 milliuns uffants èn naschids l'onn passà en territoris da crisa sco l'Afganistan, la Siria u il Jemen, scriva l'Ovra d'agid per uffants da las Naziuns Unidas, Unicef. Quai vul dir, che mintga 5avel uffant passenta ses emprims onns da vita en malsegirtad, caos, conflict e stress. Sco l'Unicef ha communitgà il venderdi a New York, chaschuna quai savens ch'ils pops sajan tementads e sutnutrids.
Sper ils privels directs possian ils effects durabels d'ina tala partenza en la vita esser catastrofals, ha ditg la schefa da l'Unicef, Henrietta Fore. Las famiglias pertutgadas dovrian urgentamain dapli sustegn.
RR novitads 06:00