A Brüssel cuntinueschan ils 27 schefs da stadi e da regenza da l’UE lur tractativas en il rom da lur inscunter suprem. Il president dal Cussegl da l’UE Charles Michel ha fatg ina nova proposta.
Il pachet d’agid da corona planisà da 750 milliardas euros duai gidar pajais ch’èn ferm pertutgads da la pandemia – sco l’Italia u la Spagna. Il punct dispitaivel è, quant da las 750 milliardas ch’ils pajais duain stuair pajar enavos.
La nova proposta dal president dal cussegl da l’UE Charles Michel prevesa – ch’ils stadis ston pajar enavos betg mo 250, ma 300 milliardas euros da l’agid.
Rom finanzial per plirs onns
In’ulteriura decisiun ch’è previsa il segund di da l’inscunter – è davart il rom da finanzas da l’UE fin il 2027. Quest budget prevesa ina summa da bundant 1'000 milliardas euros.