Siglir tar il cuntegn

Header

cuntegn

Update dals 28 da schaner Kiev convochescha l'ambassadur da l'Ungaria

28 da schaner

  • Il ministeri da l’exteriur ucranais ha annunzià da convocar l’ambassadur da l’Ungaria. La raschun è ch'Il president ungarais Viktor Orban haja fatg remartgas areguard l’Ucraina che sajan stadas cumplettamain inacceptablas. Concret haja Orban numnà l’Ucraina «ina terra da nagin» e cumpareglià ella cun l’Afganistan. Kiev renfatscha ad Orban da vulair destruir sapientivamain las relaziuns tranter ils dus pajais. Budapest n’ha anc betg prendì posiziun en chaussa.

27 da schaner

  • L’Uniun europeica prolunghescha las sancziuns economicas cunter la Russia per 6 mais. Pervi da la guerra cunter l’Ucraina valian uss las mesiras enfin la fin da fanadur,ha communitgà il cussegl da l’UE. Actualmain cumpiglian las sancziuns ils secturs commerzi, finanzas, tecnologia e traffic. Plinavant datti era in vast stop d’importar petroli da la Russia. E pliras bancas russas èn vegnidas sclausas da la rait da communicaziun da bancas «Swift».
  • La regenza da la Pologna sustegness la furniziun d'eroplans da cumbat per l'Ucraina. Il primminister Mateusz Morawiecki ha ditg envers l'emettur franzos LCI che la NATO duess esser pli curaschusa. La Pologna sustegness la furniziun d'eroplans ma a la fin saja la decisiun ina da tut la NATO. Il chancelier tudestg Olaf Scholz ha ditg quest'emna che la Germania na vegnia betg a furnir er eroplans suenter ils panzers.
  • L'assamblea parlamentara dal Cussegl da l’Europa pretenda unanimamain in tribunal per delinquents da guerra che duai sclerir ils crims commess en l’Ucraina. Quest tribunal duaja vegnir stgaffì a la Curt penala internaziunala a Den Haag. Ils manaders da la politica e da l’armada, ch’hajan planisà, preparà u exequì l’invasiun en l’Ucraina, duajan vegnir persequitads dal tribunal spezial. Tenor la pretensiun da la chombra duai il Cussegl da l’Europa surpigliar ina rolla directiva tar il svilup dal tribunal e vegnir sustegnì dad uschè blers stadis ed organisaziuns sco pussibel.

26 da schaner

  • La Svizra trametta puspè rauba d’agid per la populaziun en l’Ucraina. Quai ha communitgà il departament da defensiun. L’armada svizra metta a disposiziun a la populaziun ucranaisa vestgadira ed equipament – per che quella possia sa proteger dal fraid. Tranter auter guants, soccas e cuvertas. Bunamain 400 palettas da material sajan il mument en viadi cun il camiun vers Kiev. Gia il december aveva la Svizra furnì radiaturs e generaturs a l’Ucraina.
  • Per la Russia è la furniziun da panzers da cumbat a l’Ucraina ina participaziun directa dal vest al conflict. Il Kremlin ha prendì per l’emprima giada uffizialmain posiziun en chaussa. Il chancelier tudestg, Olaf Scholz, da sia vart ha ditg che la Germania na daventia en nagin cas ina partida da guerra cun furnir panzers a l’Ucraina. Ier ha la Germania ed ils Stadis Unids annunzià da furnir panzers a l’Ucraina.
  • L’armada russa ha para puspè bumbardà divers lieus en l’Ucraina cun rachetas. En la chapitala Kiev saja morta almain ina persuna tras ina racheta, uschia il president da la citad Vitali Klitschko. Almain duas persunas sajan vegnidas blessadas. Er or dad autras regiuns dal pajais datti rapports davart attatgas russas cun rachetas. Uschia hajan diversas rachetas cuntanschì la citad Winnyzja en il center dal pajais, ha ditg in pledader da l’aviatica militara ucranaisa tenor l’agentura da novitads Reuters. Persunas mortas u blessadas n’haja là betg dà.
  • La Svizra trametta puspè rauba d’agid en l’Ucraina. Quai ha communitgà il departament da defensiun. L’armada svizra metta a disposiziun a la populaziun ucranaisa vestgadira ed equipament per che quella possia sa proteger dal fraid. Tranter auter guants, soccas e cuvertas. Bunamain 400 palettas da material sajan il mument en viadi cun il camiun vers Kiev. Gia il december aveva la Svizra furnì radiaturs e generaturs a l’Ucraina.
  • L’UNESCO ha declerà la citad veglia dad Odessa sco Patrimoni cultural mundial periclità. Quai en in proceder accelerà, sco l’organisaziun da cultura da las Naziuns unidas ha communitgà a Paris. Cun quest pass saja pussibel da profitar d'agid tecnic e finanzial per proteger e mantegnair la citad veglia dad Odessa. Dapi l’invasiun russa è la citad da port adina puspè vegnida bumbardada. Sco ultim han ils Russ donnegià ferm l’infrastructura d’energia, ma er chasas abitadas.

25 da schaner

  • La Germania furnescha 14 panzers da cumbat dal tip «Leopard 2» a l’Ucraina. Quai ha la regenza tudestga communitgà. Uschia conferma la regenza quai che las medias tudestgas avevan gia rapportà ier. Plinavant vul la regenza tudestga er lubir als auters pajais da furnir panzers. Autras regenzas europeicas aveva gia signalisà da furnir panzers dal tip Leopard a l’Ucraina. Cifras concretas n’èn però anc betg sin maisa.
  • En connex cun la furniziun d'armas a l'Ucraina è mardi er s'exprimida la cumissiun per la segirezza politica dal Cussegl naziunal. Quella pretenda che material da guerra svizzer dastgia sut tschertas cundiziuns vegnir dà vinavant dad auters stadis a tals che fan guerra. La cumissiun ha perquai approvà duas moziuns. Uschia duai material da guerra che vegn producì en Svizra tranter auter pudair vegnì dà vinavant sche la furniziun stat en connex cun l'offensiva russa en l'Ucraina. La segunda moziun prevesa da lubir la furniziun en situaziuns che cuntrafan tenor l'ONU al scumond da violenza en connex cun il dretg internaziunal.
  • La Tirchia ha spustà in inscunter cun la Svezia e la Finlanda sin in temp betg definì, quai rapporta l'emettur statal TRT. La raschun n'è per il mument betg clera. L'inscunter fiss stà il favrer a Brüssel. Latiers fissi ì per cussegliaziuns davart la commembranza planisada da la Finlanda e la Svezia en la NATO. Ordavant aveva il president tirc Recep Tayyip Erdogan ditg che la Svezia na possia betg pli quintar cun il sustegn da la Tirchia. Quai suenter ch'igl aveva dà la fin d'emna protests en la chapitala svedaisa. Tar quels eri vegnì brischà in Coran

24 da schaner

  • Il «Spiegel» e la «Deutsche Presse-Agentur» rapportan che la regenza tudestga sa saja decidida da furnir chars armads dal tip «Leopard» a l'Ucraina. Latiers veglia ella er lubir la furniziun da panzers per l'Ucraina tras auters pajais. Sco che l'agentura ap rapporta, veglian ils Stadis Unids da l'America lubir la furniziun da panzers dal tip «Abrams».
  • Il president ucranais Wolodimir Selenski ha relaschà il viceschef da ses biro presidial Kyrylo Tymoschenko. Quel era dà en egl perquai ch'el è stà sin via cun in vehichel champester american ch'il concern General Motors aveva mess a disposiziun per salvar persunas or da zonas da cumbat e per missiuns umanitaras. Il prim è Tymoschenko sa giustifitgà ed ha ditg ch'el haja fatg quels viadis en servetsch. Suenter gronda critica ha Tymoschenko dentant dumandà Selenski da suspender el, e quel ha dà suatientscha a ses giavisch.
  • La Svezia na possia betg pli quintar cun il sustegn da la Tirchia en chaussa adesiun a la NATO, quai ha ditg il president tirc Recep Tayyip Erdogan. La raschun èn ils protests lubids da la fin d'emna en Svezia. Tar quels èsi tranter auter vegnì brischà in Coran. Tgi che n'haja nagin respect da la cardientscha dals Mulsims na possia betg survegnir sustegn, uschia Erdogan. Il commember da la NATO la Tirchia blochescha dapi mais l'adesiun da la Svezia e da la Finlanda a l'allianza milirara. Ankara renfatscha a la Svezia da sustegnair la partida dals lavurants curda PKK.

RTR novitads+

Artitgels legids il pli savens

Scrollar a sanestra Scrollar a dretga