Guerra en il Proxim Orient - Ulteriurs barats d'ostagis e praschuniers

7 da favrer

• La Hamas ha dà ils nums dad ulteriurs ostagis a l'Israel. Planisà è che trais ulteriuras persunas ch'èn dapi ils 7 d'october 2023 a ferm en la Striva la Gaza vegnan libras. Per ils trais ostagis duain vegnir libers 183 praschuniers palestinais, uschia rapportan agenturas da novitads. Quest barat fiss il tschintgavel che stat en connex cun la pausa da cumbat che vala dapi ils 19 da schaner.

30 da schaner

• En la Strivla da Gaza ha la Hamas cumenzà a laschar liber ulteriurs ostagis. En ina transmissiun da televisiun live èsi da vesair co ch'ina schuldada israeliana vegn surdada a represchentants da la Crusch Cotschna. Tenor las infurmaziuns preliminaras duain oz er vegnir libers tschintg lavurers tailandais ed in burgais tudestg-israelian. L'Israel vegn sco cuntermesira a laschar ord praschun 110 praschuniers palestinais, tranter quels sa chattan almain 30 persunas ch'èn vegnidas sentenziadas pervia da mazzament. Sche la surdada dals ostagis gartegia sa chattan anc 80 ostagis en ils mauns da la Hamas.

27 da schaner

• La pausa da cumbat tranter l’Israel e la Hisbollah en il Libanon vegn prolungada fin ils 18 da favrer. Quai han communitgà ils Stadis Unids. La pausa da cumbat era scadida ier suenter dus mais. Tenor las autoritads libanaisas sajan silsuenter almain 15 persunas vegnidas mazzadas tar attatgas israelianas. Passa 80 ulteriuras sajan vegnidas blessadas. Previs era atgnamain ch'il Israel retira sias truppas dal Libanon entaifer 60 dis. Las truppas da la Hisbollah avessan da sa retrair fin var 30 kilometers davent dal cunfin cun l'Israel. Quai na saja dentant anc betg capità dal tuttafatg.
• Suenter la prolungaziun da la pausa da cumbat ha l'armada libanaisa surpiglià la controlla da plirs vitgs e citads en il sid dal pajais. Tenor l'agentura da novitads tudestga DPA returnian er dapli glieud puspè en lur vitgs.
• Suenter ils retards en connex cun laschar liber in ostagi èn l’Israel e la Hamas sa cunvegnids. Quai han communitgà il primminister israelian Benjamin Netanjahu ed il Katar, ch’ha intermedià en chaussa. La Hamas laschia liber ina civilista ensemen cun dus ulteriurs ostagis fin venderdi. L’Israel da sia vart lubeschia a la populaziun civila da turnar en il nord da la Strivla da Gaza. Quai a partir dad oz. Perquai che la Hamas n’ha betg laschà liber la dunna sco fatg giu la fin d’emna, n’han ils Palestinais betg pudì turnar en il nord da la strivla.
• Tenor la Hamas èn 8 da 33 ostagis che duain vegnir libers aifer l'emprima fasa da la pausa da cumbat morts. 25 dad els sajan anc en vita, sco quai ch'in commember da l'organisaziun isliamistica ha ditg envers l'agentura da pressa tudestga. In pledader da la regenza israeliana ha ditg ch'ina glista cun questas cifras che saja vegnida surdada da la Hamas correspundia a las infurmaziuns dal servetsch secret israliean.

22 da schaner

• Curt suenter il cumenzament da la pausa da cumbat en la Strivla da Gaza ha l'Israel lantschà ina gronda operaziun militara cunter palestinais militants en la Cisjordania. Il primminister israelian Benjamin Netanjahu ha annunzià l'operaziun militara cun il num «mir da fier» che vegnia ad esser gronda ed impurtanta. L'operaziun militara ha cumenzà cun ina seria d'attatgas cun drona sin indriz che vegnian nizzegiads da gruppas terroristicas. Tenor indicaziuns da las autoritads da sanadad localas èn mortas dapli che 10 persunas en la citad da Dschenin. Almain 40 persunas sajan blessadas.

20 da schaner

• Durant il segund di da la pausa da fieu tranter l'Israel e la Hamas èn 915 camiuns cun rauba d'agid arrivads en la Strivla dal Gaza. Quai rapportan las Naziuns Unidas. Ils emprims 10 dis da la pausa da fieu mintga di var 1,2 milliuns liters carburant manads en la strivla da Gaza. Uschia duessan tranter auter ospitals ed alloschis d'urgenza avair carburant per forza electrica. Quai ha communitgà il stadi dal Katar ch'aveva media tranter l'Israel e la Hamas. Tar il cunfin cun l'Egipta, a Rafah, stettian anc pront dapli che 3'000 camiuns cun rauba d'agid.

19 da schaner

• La pausa da cumbat tranter l’Israel e la milissa radical-islama Hamas ha cumenzà las 10:15 temp svizzer. Quai ha confermà l’armada israeliana. En sasez avess la pausa gia stuì cumenzar a las 07:30. Dentant n’ha la Hamas betg tramess ad uras ina glista da nums dals trais ostagis che duajan vegnir libers en il decurs dal di. Tenor cunvegna duai la pausa da cumbat en la Strivla da Gaza valair sis emnas.
• Ils emprims trais ostagis israelians ha la Hamas surdà al Comité internaziunal da la Crusch Cotschna. En tut duain 33 ostagis vegnir libers en il rom da la pausa da cumbat tranter l'Israel e la milissa radical-islama Hamas. L'Israel da sia vart vegn a laschar liber bun 1'900 Palestinais.
• Il minister da polizia israelian Itamar Ben-Gvirha demissiunà ensemen cun dus ulteriurs ministers da sia partida religius-naziunalistica Otzma Jehudit. Els han bandunà la coaliziun dal primminister Benjamin Netanjahu. Il motiv per quai è la dispita pervi da la pausa da cumbat cun la Hamas.
• Il minister da finanzas istaelian Bezalel Smotrich smanatscha da bandunar la regenza sche l'Israel fineschia la guerra cunter la Hamas en la Strivla da Gaza. Il schef da la partida dretg-extrema Zionissem Religius na possia betg restar en ina regenza che fetschia quai.

17 da schaner

• En l'Irasel han plirs ministers entant annunzià ch'els sa retirian sche la regenza approvescha la pausa da cumbat. Tranter quels sa chatta er il minister da segirtad dretg-extrem Ben-Gvir. Sco reacziun sin las smanatschas dals ministers ha il manader da l'opposiziun Yair Lapid declerà ch'el vegnia a sustegnair la regenza. La pausa da cumbat saja pli impurtanta che differenzas d'opiniun ch'el haja insacura gì cun il prim-minister Benjamin Netanjahu.
• l primminister israelian Benjamin Netanjahu ha annunzià ch'i haja tar las contractivas tuttina anc dà ina cunvegna per ina pausa da cumbat en l'ultima minuta. La Hamas laschia liber ostagis israelians e l'Israel percunter plirs praschuniers palestinais. L'emprim barat pudessia gia avair lieu la proxima dumengia – l'emprim stoppia dentant anc la regenza israeliana acceptar la cunvegna. Quella s'inscuntra sonda.

16 da schaner

• La pausa da cumbat en il Proxim Orient na para tuttina betg definitiva. Suenter ch'ils intermediaturs dal Katar e dals Stadis Unids avevan publitgà ch'ina cunvegna saja reussida, fa l'Israel rinfatschas a la Hamas. Lezza na respectia betg tschertas parts da la cunvegna, ha il primminister israelian Benjamin Netanjahu ditg. La regenza israeliana vegnia però pir a decider davart la cunvegna, sche la Hamas respectia tut las cundiziuns da la cunvegna. La damaun avevan ils intermediaturs e las intermediaturas dal Catar, da l'Egipta e dals Stadis Unids communitgà ch'ina cunvegna saja reussida – e duai ir en vigur questa dumengia. Tranter auter era per laschar liber praschuniers e praschunieras dad omaduas varts.

• L'Uniun europeica ha annunzià in'ulteriur pachet d'agid per la Strivla da Gaza da 120 milliuns euros. Cun quai munta il sustegn total da l'UE dapi l'onn 2023 a 450 milliuns euros, quai che correspunda a bun 420 milliuns francs. «I dat bain speranza ussa, cun la pausa da cumbat annunziada», di la presidenta da la cumissiun da l'UE Ursula von der Leyen. La situaziun umanitara saja però anc adina catastrofala. Il nov pachet cumpiglia tranter auter victualias, rauba medicinala ed agid per il provediment cun aua.

15 da schaner

• L’Israel e l’organisaziun palestinaisa Hamas hajan sa cunvegnids sin ina pausa da fieu. Quai rapporta l’agentura da novitads Reuters, sa basond sin in insider. En il decurs da la saira hai dà confermas da pliras varts. La pausa da fieu duai cuzzar sis emnas. Durant quel temp duain tranter auter vegnir barattads ostagis e praschuniers. Plinavant duai l’armada israeliana sa retrair pass per pass or da la Strivla da Gaza. Var 600 camiuns duain pudair transportar rauba d’agir en las zonas da cumbat. La pausa da fieu duai ir en vigur dumengia ils 19 da schaner 2025 a las 12:15.
• La cunvegna tranter la Hamas ed il Israel vegn bainvegnida da differentas varts. Il secretari general da l'ONU Antonio Guterres intunescha ch'ins stoppia evitar las grondas dolurs da la populaziun. Il primminister da la Gronda Britannia, Keir Stramer, discurra ch'i saja nairas uras per quel messadi. Tenor la ministra da l'exteriur da la Germania, Annalena Baerbock, dettia la speranza ch'il «murir en la Strivla da Gaza piglia ina fin».

11 da schaner

• Il schef dal servetsch secret israelian per l'extern Mossad è viagià en la chapitala dal Katar Doha. L'Israel negoziescha là davart ina pausa da cumbat per la Strivla da Gaza. Il Katar intermediescha ensemen cun l'Egipta ed ils Stadis Unids tranter l'Israel e la Hamas. Il minister da l'exteriur american Antony Blinken aveva ditg quest'emna, ch'ina cunvegnientscha saja datiers.
• En la Strivla da Gaza ha l'aviatica militara israeliana destruì in post da commando da la Hamas. Quai tenor atgnas indicaziuns. Davart eventualas unfrendas tar l'attatga a Dschabaliya na di l'armada israeliana nagut. L'agentura da novitads palestinaisa Wafa rapporta però dad almain otg persunas mortas, tranter questas era dus civilists. Infurmaziuns independentas na datti anc naginas. Tar in'autra attatga a Dschabaliya rapporta l'armada israeliana d'avair eliminà trais cumbattants armads.

7 da schaner

• L'armada israeliana sa retiria da la citad Nakura, en il sid dal Libanon, ha ditg in represchentant american en il Libanon, quai rapportan pliras agenturas da novitads. L'armada libanaisa haja confermà quai. I sa tracta da la segunda retratga da truppas israelianas – ch'è vegnì enconuschent dapi ch'ina pausa da cumbat è ida en vigur – la fin da november – ina pausa da cumbat tranter la Hisbollah radical-islamica e l'Israel. Tenor quella sto l'Israel sa retrair entaifer 60 dis dal sid dal Libanon. Persuenter duajan truppas da l'armada libanaisa e schuldads da las chapellinas blauas surpigliar la controlla.

5 da schaner

• L'armada israeliana haja questa fin d'emna attatgà passa 100 miras en la Strivla da Gaza, quai tenor atgnas indicaziuns. Ins haja mazzà tozzels da terrorists da la Hamas radical-islamistica, scriva l'armada. L'armada haja er attatgà pliras rampas danunder che la Hamas sajetta sin territoris israelians. Las indicaziuns na sa laschan betg verifitgar independentamain.

4 da schaner

• En pliras citads israelianas han millis da persunas protestà per in deal d'ostagis e cunter la regenza dal primminister Benjamin Netanjahu. A Tel Aviv haja era dà confruntaziuns cun la polizia, sco medias rapportan. Sis persunas sajan vegnidas arrestadas. Confamigliars dals ostagis e demonstrantas e demonstrants rinfatschan a Netanjahu dad evitar ina pausa da cumbat cun la Hamas ed uschia la liberaziun dals ostagis, quai cun adina far novas pretaisas. La regenza israeliana refusa quai.

3 da schaner

• L’Israel trametta in’ulteriura delegaziun en il Katar per manar discurs davart ina pausa da cumbat per la Strivla da Gaza. Per l’Israel giaja persuenter ch’ils ostagis restants vegnian libers. Quai ha communitgà il biro dal primminister Benjamin Netanjahu. Era la Hamas ha annunzià da trametter ina delegaziun en il Katar.
• Entant ha l’Israel cuntinuà cun sias attatgas or da l’aria. Tenor l’armada sajan bleras miras en la Strivla da Gaza vegnidas attatgadas. Tranter auter sajan il schef da la polizia da la Hamas e ses substitut vegnids mazzads. Tenor indicaziuns palestinaisas ha l’Israel bumbardà passa 30 miras e mazzà radund 70 persunas, era civilists.