Siglir tar il cuntegn

Header

cuntegn

Exteriur «Urbi et Orbi» en la daratga

Papa Francestg ha dà questa dumengia la benedicziun tradiziunala «Urbi et Orbi» avant millis pelegrins da l’entir mund, ch’han spetgà da tutta daratga sin il plaz da s. Peder. Ed a Cuira ha uvestg Vitus Huonder predegià en la messa pontificala cunter la mort libra.

Avant aveva il papa festivà la messa da Pasca per la levada da Jesus Cristus ed annunzià ses messadi da Pasca. En quel ha el supplitgà per pasch en las regiuns da crisa e da conflict en il mund e per levgiament per Cristians persequitads.

«In pass definitiv en direcziun d’in mund pli segir»

Areguard la cunvegna d’atom cun l’Iran ha ditg il papa ch’el speria che quai saja «in pass definitiv en direcziun d’in mund pli segir».

Franciscus ha supplitgà ils umans da s’inscuntrar cun respect ed umilitad. El ha crititgà la tenuta «da sa metter atras per tut pretsch, da concurrer, da sa far valair».

La benedicziun ed il messadi da Pasca han milliuns da cartents era suandà sur televisiun ed en l’internet. Igl è il punct culminant da las festas tradiziunalas da Pasca a Roma.

Uvestg Huonder predegia cunter Exit

A Cuira ha uvestg Vitus Huonder predegià en la messa pontificala cunter la mort libra pussibilitada entras organisaziuns sco «Exit». El ha ditg che la cardientscha na lubeschia betg da persequitar ina tala ideologia. Gist Pasca e la passiun da Jesus mussian ch'il punct da l'atgna mort saja da laschar en ils mauns da Dieu.

RR novitads 14:00

Artitgels legids il pli savens