En pli ha il parsura da la Baselgia catolica pretendì ina fin da guerra e da violenza a chasa. En l’entir mund dettia anc adina blers conflicts e crisas e savens na fetschian ils umans gnanc pli stim e na sajan betg pronts da tschertgar il dialog. Sco exempels ha el tranter auter numnà ils conflicts en la Siria, il Jemen e l’Afganistan. Ultra da quai ha el urà per las dunnas che sajan daventadas unfrendas da violenza a chasa durant la pandemia, per uffants malduvrads ed er per persunas pli veglias che sajan persulas.
Silsuenter ha papa Francestg dà la benedicziun tradiziunala «Urbi et Orbi». Plirs tschients cartents han celebrà la messa da Nadal cun il papa sin la plazza da son Peder a Roma.