Ils Stadis Unids e la Corea dal Sid han cumenzà cun l'exercizi militar annual ch'els avevan il favrer spustà pervia dals gieus olimpics a Pyoengchang ed uschia favurisà la situaziun tranter la Corea dal Sid e la Corea dal Nord.
Tenor il Pentagon sajan bunamain 300'000 schuldads da la Corea dal Sid e radund 24'000 dals Stadis Unids da la partida. I sa tractia da truppas terrestras, l’aviatica militara, la marina e forzas spezialas. La manevra cun il num «Foal Eagle» vegnia a cuzzar radund in mais, ha in pledader ditg a Seoul. Auters onns aveva l'exercizi militar cuzzà bunamain duas mais.
Examinar prontadad militara
Cun ils exercizis militars regulars vulan ils dus pajais examinar lur prontadad per in conflict sin la peninsla coreana. Quai aveva ils davos onns adina fruntà sin protest tar la Corea dal Nord.
La manevra ha cumenzà bunamain in mais avant l'inscunter planisà tranter Il president da la Corea dal Nord Kim Jong-un ed il president dal la Corea dal Sid Moon Jae-in.
RR novitads 06:00