Siglir tar il cuntegn

Exteriur USA ed Israel bandunan l'UNESCO

Il ministeri da l'exteriur american ha declerà ch'ils Stadis Unids sa retiran la fin dal 2018 da l'organisaziun da l'ONU per educaziun, scienza e cultura. Curt suenter ha era l'Israel communitgà da bandunar l'UNESCO.

logo da l'unesco e bandieras da commembers sutvart
Legenda: La UNESCO ha a partir dal 2019 in commember damain – Ils Stadis Unids sco pajader da contribuziun il pli grond extreschan. Keystone

Sin ils 31 da december dal 2018 sortan ils Stadis Unids da l'UNESCO, l'organisaziun da l'ONU per cultura e furmaziun. Quai declera il ministeri da l'exteriur dals Stadis Unids. Sco raschuns inditgeschian ils Stadis Unids il basegn da refurmar la UNESCO profundamain. Curt suenter ha era il biro dal primminister israelian Benjamin Netanjahu communitgà da bandunar l'organisaziun.

La lavur da l'UNESCO è ils ultims onns adina puspè stada sumbrivada da dispitas enturn il conflict en il Proxim Orient. Suenter che l'UNESCO aveva acceptà la Palestina, avevan ils Stadis Unids sistì ils pajaments.

UNESCO deplorescha

L'UNESCO ha en ina emprima reacziun deplorà quest pass dals Stadis Unids. Tenor la directura generala da l'UNESCO, Irina Bokowa, munta l'extrada ina sperdita «per la famiglia da las Naziuns Unidas» e per il multiculturalissem, ha ditg Bokowa.

RR novitads 16:00+