Il president dals Stadis Unids Joe Biden ha appellà a la populaziun da far diever da tut las pussaivladads da sa laschar vaccinar. Quai saja impurtant en vista a la nova varianta omicron. Ultra da quai ha il president american empermess da metter a disposiziun dapli schuldada per sustegnair ils ospitals. En pli vegnia ina mesa milliarda tests da corona gratuits repartids a la populaziun a partir dal schaner. Il problem sajan ils umans che na sa laschian betg vaccinar, ha ditg Biden.
Omicron sa derasa e dominescha ils Stadis Unids
Entant dominescha la varianta omicron er en ils Stadis Unids. Ella sa derasa spert: Il dumber da cas sa dublegia mintga trais dis. Tenor stimaziuns da las autoritads da sanadad americanas dals «Centers for Disease Control and Prevention» (CDC) sa tractia tar las novas infecziuns tar radund 75% da la varianta omicron.
Bun 61% da la populaziun è vaccinada
Actualmain èn en ils Stadis Unids virolads duas giadas 61,5% da la populaziun che quinta totalmain 330 milliuns persunas. Dals vaccinads hajan radund 30% survegnì il terz vaccin.