Siglir tar il cuntegn

Exteriur USA: Famiglias na vegnan betg pli separadas

Sut squitsch er dals republicans ha il president american mess ina fin a la pratica da separar immigrants illegals da lur uffants.

ina dunna cun dus uffants da davosen.
Legenda: La USA terminescha la pratica da separar uffants d'immigrants illegals da lur famiglias. Keystone

famiglias d'immigrants na vegnan betg pli separadas en ils Stadis Unids. Cun in decret provisoric ha il president american Donald Trump mess ina fin a la pratica da separar immigrants illegals da lur uffants – quai sut squitsch er or da las ritschas dals republicans.

El haja suttascrit ina regulaziun che duaja silsuenter vegnir remplazzada tras ina lescha, ha ditg Trump a Washington. Pervi da la politica da nulla toleranza da la regenza americana valevan tuttas persunas che vegnivan illegal en ils Stadis Unids sco criminals. Perquai ch’ins na dastgava betg metter en praschun ils uffants ensemen cun ils geniturs, vegnivan las famiglias separadas.

Tenor indicaziuns da la regenza sajan tranter ils 5 da matg ed ils 9 da zercladur passa 2’300 uffants vegnids separads da lur geniturs. Questa pratica è vegnida crititgada internaziunalmain cun vehemenza.

RR novitads 06:00