USA furneschan dronas a stadis alliads

En il cumbat cunter il terrorissem vulan ils Stadis Unids en l'avegnir er furnir dronas da cumbat a stadis alliads. Suenter lungas examinaziuns ha il ministeri da l'exteriur decis da schluccar las directivas per ils exports d'armas. Enfin oz survegn be la Gronda Britannia dronas americanas.

drona, furma d'eroplan Bild in Lightbox öffnen.

Legenda da maletgs: Ina drona da cumbat. Reuters

L'export da tals aviuns betg equipads vegnia dentant decis da cas tar cas uschia il minister da l'exteriur. Clients pussaivels n'èn dentant betg vegnids numnads. Tenor infurmaziuns da la gasetta "Washington Post" duain l'Italia, la Tirchia ed intginas monarchias dal golf avair interess.

La Svizra vul era cumprar dronas

Sin l'entir mund produceschan be paucs pajais dronas da cumbat, sper ils Stadis Unids èn quai tranter auter era l'Israel e la China. Era la Svizra vul cumprar dronas. Avant in'emna ha il Cussel federal decidì da cumprar 6 dronas dal producent israelian Elbit Systems per radund 250 milliuns francs. Il parlament ha anc da decider davart questa cumpra.