Il crimi d’eleger in nov pledader da la chombra dals represchentants en ils Stadis Unids è a fin. Ils deputads e las deputadas da la chombra dals represchentants han elegì il republican Kevin McCarthy sco nov pledader. El suonda uschia a la democrata Nancy Pelosi. Sco nov «speaker» è McCarthy il numer trais da la ierarchia statala – suenter il president e la vicepresidenta.
Suenter tschintg dis e 15 scrutinis
En las rundas avant avevan divers collegas da partida renunzià da sustegnair il politicher da 57 onns. Plirs republicans da l'ur dretg da la partida han bloccà l'elecziun ed uschia sfurzà McCarthy da far concessiuns a lur favur. La finala hai duvrà 15 rundas d'elecziun, pir il tschintgavel di hai dà ina decisiun. Quai è l’emprima giada en 100 onns che la chasa dals represchentants n’ha betg elegì ses uschenumnà «Speaker» en l’emprim scrutini. Dapi 164 onns n'ha l'elecziun dal pledader betg durà uschè ditg.
Schlet sgnal per il futur
La chombra da represchentants ha impurtantas incumbensas. Per exempel ston ils deputads e deputadas approvar il budget che finanziescha las fatschentas da la regenza. Cun dispitas en la chombra vegn quai process ina sfida. Sche la chombra da represchentants na vegn betg perina datti in «Shutdown» che po chaschunar ina bloccada da pajaments da la pli gronda economia publica dal mund – i smanatscha ina crisa da finanzas.
Il democrat Chuck Schumer admonescha gia che las «concessiuns da McCarthy als extremists en sia partida» fetschian pli probabel in shutdown. Quai manass a consequenzas desastrusas per il pajais.
Explicaziun dal shutdown:
Sustegn ha mancà ditg – dad omaduas varts
Il deputà Kevin McCarthy da la California vuleva gia il 2015 daventar Speaker. Aveva lura però retratg sia candidatura pervi da mancanza da sustegn. Ussa ch'ils Republicans han la maioritad en la chombra dals represchentants ha el però puspè candidà per la successiun da la democrata Nancy Pelosi.
Trump sa maschaida en
Er l'anteriur president american, Donald Trump è entant sa maschadà en il cumbat da pussanza per manar la chasa dals represchentants americana. Via sia plattafurma «Truth Social» ha el appellà ses collegas da partida d'eleger McCarthy.
Legislaziun bloccada enfin tar l'elecziun
Las deputadas ed ils deputads ston eleger lur president en l'emprima sesida per pudair cumenzar a lavurar. Uschè ditg ch'i na dat nagin president è la legislaziun bloccada.
Quants scrutinis ch'i dovra per eleger in president u ina presidenta n'è betg limità. Il 1855/56 è quai stà in'elecziun sur dus mais e cun 133 scrutinis.