Siglir tar il cuntegn

Header

Navigaziun

cuntegn

USA Trump lantscha cumbat electoral

Il president american Donald Trump ha lantschà uffizialmain il cumbat electoral per sia reelecziun il 2020. Ad Orlando en il stadi Florida han 20'000 aderents da Trump giubilà durant ses pled cun bleras parolas e paucs commentaris concrets.

Il president american Donalt Trump è sa ludà avant ses aderents d’avair mess sin il chau Washington. Cun ses slogan «Keep America great» («Mantegnair grondius ils Stadis Unids») va el en la cursa per sia reelecziun. Il republican da 73 onns ha avertì ils preschents ch’ils democrats veglian destruir ils Stadis Unids sco quai ch’els sa preschentian il mument.

Bler parolas – pauc concret

En ses pled ha el plinavant fatg diever da sias tipicas parolas da cumbat electoral, scrivan las agenturas da novitads. Uschia ha el per exempel declerà che nagin’autra regenza haja cuntanschì tant sco la sia durant dus onns e mez. I giaja cun l’economia uschè bain sco anc mai, la quota da dischoccupaziun saja fitg bassa ed ils Stadis Unids vegnian respectads sin nivel internaziunal. Er il futur na saja anc mai stà uschè grondius. Insatge ha però mancà: Trump n’è strusch s'exprimì pli concret davart sia agenda politica.

fulla da 20'000 aderents da Trump en stadion.
Legenda: 20'000 aderents èn sa radunands per l'emprim event dal cumbat electoral da Trump ad Orlando en il stadi dal sid Florida. Keystone

Florida – in «Swing State» d'impurtanza

Che Trump cumenza ses cumbat electoral a Florida n’è nagina casualitad. I sa tracta dal terz impurtant stadi federativ – almain quai che pertutga las vuschs dals electurs delegads. Plinavant è Florida in dals stadis nua ch’i n’è betg cler, sche la glieud elegia ils democrats u ils republicans – pia in uschenumnà «Swing State».

RR novitads 06:00