Siglir tar il cuntegn

Header

cuntegn

Exteriur USA vul sortir dal Cussegl dals dretgs umans

La regenza da Donald Trump ha annunzià da sortir dal Cussegl dals dretgs umans da la UNO. Il minister da l'exteriur, Mike Pompeo, e l'ambassadura da l'UNO, Nikki Haley argumenteschan quest pass cun la critica dal cussegl envers l'Israel. Er na saja il gremi betg pront per refurmas.

L’ambassadura americana tar las Naziuns Unidas, Nikki Haley, aveva gia smanatschà avant in onn da sortir dal Cussegl dals dretgs umans. Quai en emprima lingia pervi da la critica cunter l’Israel. L’entschatta da quest’emna aveva il cussegl crititgà ils Stadis Unids pervi da lur pratica d’immigraziun – da separar uffants da lur famiglias.

Il secretari general da l’ONU, Antonio Guterres, deplorescha la decisiun dals Americans. El ha suttastritgà l’impurtanza da las Naziuns Unidas per la structura dals dretgs umans globala. Tenor l’incumbensada per affars exteriurs da l’Uniun europeica, Federica Mogherini, pericliteschia questa decisiun la rolla dals Stadis Unids sco defensur da la democrazia. Percunter cuntent cun la decisiuns dals Stadis Unids è l’Israel.

Il Cussegl dals dretgs umans è vegnì fundà il 2006. Ils Stadis Unids èn daventads commember trais onns pli tard sut president Obama.

RR novitads 06:00

Artitgels legids il pli savens