La procedura cunter AstraZeneca ha cumenzà davant in tribunal en Belgia. Quella succedia era en il num dals 27 pajais commembers da l’UE – ha ditg in pledader da la cumissiun da l’UE. Pli baud aveva la cumissiun gia instradà ina procedura da mediaziun cunter l’interpresa svedais-britannica.
AstraZeneca era s’obligada l’avust 2020, da furnir a l’UE en tut 300 milliuns dosas da vaccinaziun enfin il zercladur che vegn. Ils davos mais aveva il concern dentant adina puspè reducì sias furniziuns dal vaccin, senza discurrer cun l’UE. L’emprim quartal ha AstraZeneca furnì sulet 30 millliuns dosas, enstagl da las 120 milliuns fixadas.
Entant dovran intgins pajais da l’UE il vaccin da AstraZeneca mo pli precaut, damai ch’el vegn mess en relaziun cun rars cas da trombosas dal tscharvè.
Sa tegnì vid las cunvegnas
AstraZeneca ha reagì sin il nov pass da la cumissiun da l’UE, e di ch’els hajan sa tegnì vi dal contract cun l’UE. Els vegnian a sa defender avant dretgira.
AstraZeneca scriva en sia communicaziun, ch’els vegnian a furnir als stadis da l’UE tenor las prognosas radund 50 milliuns dosas da vaccin. Ed els sajan vidlonder d’augmentar vinavant la producziun uschè spert sco pussaivel.