Il dumber dals morts e blessads pervi dal grev terratrembel da dumengia saira tranter l'Iran e l'Irac crescha cuntinuadamain. Tenor il ministeri da l'intern da l'Iran hai dà 336 morts e bunamain 4'000 blessads. I vegn temì ch'i dettia anc dapli morts. Il terratrembel da la fermezza 7,3 ha gì ses epicenter en ina regiun muntagnarda ch'è abitada plitost rar. Il president da l'Iran Hassan Ruhani ha empermess agid immediat a la regiun ed er il minister da sanadad tirc ha offrì l'agid a l'Irac dal nord.
Experts quintan cun terratrembels posteriurs
La regiun enturn la muntogna Zagros è adina puspè pertutgadas da terratrembels. In da tala fermezza sco quel da dumengia saira, saja tenor experts dentant nunusità. Plinavant saja da far quint cun terratrembels posteriurs. Quels possian sballunar bajetgs che sajan donnegiads.
6,5 a Costa Rica
Medemamain la dumengia ha la terra er stremblì a Costa Rica. Enfin uss datti naginas annunzias davart unfrendas ni donns. Sco diversas medias rapportan haja la terra stremblì 16 kilometers en il sidost da Jaco. In lieu da far bogn ch’è fitg populars tar turists. Er en la chapitala da San José hajan ils bajetgs stremblì pliras minutas. Pli tard ha il post d’observaziun seismologic da Costa Rica anc registrà divers terratrembels posteriurs.
RR novitads 06:00