Siglir tar il cuntegn

Exteriur Venezuela: President Maduro proclamescha il stadi d'urgenza

La situaziun en il pajais sidamerican escalescha pli e pli. La populaziun n'è betg cuntenta cun sia regenza.

Demonstrants en la Venezuela.
Legenda: La situaziun resta tendida en la Venezuela. Adina puspè datti confruntaziuns tranter la polizia ed aderents da l'opposiziun. Keystone

Il president venezolan Nicolas Maduro ha proclamà il stadi d’urgenza per 60 dis. El ha argumentà quest pass cun plans dals Stadis Unids e da ses inimis en l’agen pajais da cupitgar la regenza.

Detagls davart las mesiras n’ha Maduro però anc betg tradì. Ultra da quai ha el er prolungà il stadi d’urgenza economic per proteger l’economia da privels interns ed externs.

La Venezuela patescha da mancanza da mangiativas e da medicaments, sco er dad in’inflaziun extrema. Adina puspè è il current electric interrut.

L’opposiziun ch'ha la maioritad en il parlament vul tant pli spert destituir Maduro sco president. Per sonda èn planisads demonstraziuns cunter la regenza en l'entir pajais.

RR novitads 08:00