Cun il pass spezial daventia il viagiar aifer l'Europa puspè pli simpel. Tut ils stadis sajan perina ch'ins stoppia cuntinuar cun la lavur per in tal pass, uschia Charles Michel. Quai ha er confermà la chanceliera tudestga, Angela Merkel tar la conferenza da medias. Ella partia dal fatg ch'il pass saja probabel elavurà fin la stad. Er la scheffa da la cumissiun, Ursula von der Leyen ha discurrì dad almain trais mais preparaziun.
Tenor l'exempel da l'Israel
En l'Europa vulan cunzunt pajais dal sid introducir in pass spezial. La raschun èn las fatschentas entras il turissem. Tals pajais vulan dar a persunas vaccinadas e guaridas dapli libertads. Ins veglia introducir il pass spezial tenor il model dal pass verd en l'Israel, ha il chancelier austriac Sebastian Kurz ditg. Là dastgan persunas ch'han gì corona ed èn puspè saunas sco er persunas vaccinadas puspè ir en centers da fitness, en il teater u visitar eveniments da sport.