«Victualias segiras per tuts»

Oz è il di internaziunal da la sanadad e quai sut il motto «victualias segiras per tuts». L'Organisaziun da sanadad mundiala (WHO) ha perquai publitgà differentas reglas co ins po ir enturn meglier cun victualias meglier.

Cunzunt tar charn giaglina èsi da dar adatg da cuschinar endretg. Bild in Lightbox öffnen.

Legenda da maletgs: Cunzunt tar charn giaglina èsi da dar adatg da cuschinar endretg. Keystone

Cunzunt la campylobacteriosa è in grond tema. Quai è ina malsogna d'infecziun che vegn cunzunt chaschunada da charn giaglina na betg cuschina endretg.

Ella fa ch'ins ha la fuira, ch'ins ha da render e po schizunt chaschunar fevra. Cunzunt durant la stagiun da fondue chinoise e durant la stagiun da grillar datti fitg blers cas. Cun sa tegnair vida trais reglas pon ins dentant evitar quai, uschia il chemicher chantunal dal Grischun, Matthias Beckmann:

  • Adina cuschinar endretg la charn giaglina per ch'ella na saja betg pli criva
  • Mai tagliar insatge auter sin in taglier u cun in cuntè ch'è stà en contact cun charn giaglina criva
  • Adina dar quittà che per exempel las sosas dal fondue chinoise na vegnan betg en contact cun la charn criva

L'Uffizi federal da sanadad dat anc in ulteriur tip: Adina lavar bain cun aua chauda e savun tut ils utensils ch'èn vegnids en contact cun la charn giaglina. Uschia ch'i na dat nagins impediments pli per la festa da famiglia cun fondue chinoise u a la festa da gril cun amis.