Siglir tar il cuntegn

Header

cuntegn

Victurs e perdiders Urs da glatsch e coalas tutgan tar ils perdiders dal 2019

Passa 30’000 animals èn sin la glista cotschna da l'Uniun per la protecziun da la natira mundiala. Radund 6'400 èn en privel da svanir. En il mument dettia la pli gronda spariziun da spezias dapi ils dinosaurs, sco il WWF ha communitgà oz en sia nova glista da victurs e perdents per il 2019.

Ils perdents tenor il WWF

Tranter auter tutgan ils urs da glatsch tar ils perdents. Tenor il WWF vai a quels animals en tschertas regiuns bler pli mal. Tut en tut pudess lur populaziun sa sminuir per in terz, enfin il 2050. La culpa saja la crisa da clima. En la Hudson Bay dal nord vivian per exempel anc 842 exemplars. Quai saja ina digren da 18% da la populaziun dapi l'onn 2011. Tar sia ultima valitaziun, l'onn 2015, ha l'IUCN valità ils urs da glatsch (ursus maritimus) sco «periclitads». Da quest temp è l'entira populaziun vegnida schazegiada cun radund 26'000 animals.

Purtret d'in urs da glatsch.
Legenda: Ils urs da glatsch tutgan tar ils perdiers dal reginavel d'animals. Keystone

Ils rinoceros da Sumatra èn in ulteriur perdider. L'ultim rinoceros dal Sumatra è mort il november. L'abitadi dals animals era sa sminuì ferm, perquai ch'ils guauds èn vegnids runcads, damai ch'ins ha duvrà il plaz per pudair far plantaschas per ieli da palmas. L'organisaziun da protecziun per la natira IUCN ha valità il rinoceros da Sumatra sco «en privel da svanir». Il mument datti anc intgins exemplars en l'Indonesia – tenor il WWF pli pauc che 80 animals.

Purtret d'in rinoceros da l'Indonesia.
Legenda: L'ultim rinoceros dal Sumatra è mort il november. Keystone

Tar grevs incendis en l'Australia èn morts dapi l'october enturn 2'000 coalas. Quai han declerà scienziads dacurt en il parlament australian. Grondas surfatschas da guauds d'eucaliptus èn arsas, quels guauds n'èn betg be abitadi mabain er basa da viver per ils coalas. Tenor l'organisaziun da protecziun da natira da l'australia, Australia Koala Foundation, datti anc enturn 43'000 fin 100'000 coalas. Ils animals datti sulet en l'Australia. Tenor il WWF è il dumber dad els sa sminuì ils ultims 25 onns per radund in terz.

Purtret d'in coala.
Legenda: Il coala patescha dals enorms incedis ch'i dat il mument en l'Australia. Keystone

Ils victurs dal WWF

Il schacal mellen, il frar pitschen dal luf banduna pli e pli savens il sidost pli chaud da l'Europa e sa derasa en l'Europa centrala. Tenor il WWF è er quai ina consequenza dal midament dal clima che vegn pli chaud. Er en Grischun central han ins gia chattà in schacal mellen. Tenor la «Large Carnivore Initiative for Europe» datti en Europa radund 117'000 da quels animals.

Purtret d'in schacal mellen, dad ina trapla da fotografia.
Legenda: Il schacal mellen tutga tar ils victurs, el po sa derasar pli e pli fitg. Keystone

Las antilopas da saiga èn prest vegnidas sragischadas avant trais onns pervi d'in virus. Millis dals animals mongols èn morts pervi dal virus transponì da chauras e nursas. L'epidemia e l'enviern dir ch'è suandà èn stads fatals per las antilopas. Il dumber dals animals era sa sminuì da radund 11'000 a 3'000 animals. La populaziun saja anc adina fermamain sminuida, ma intgins dals animals mussan uss in'immunitad encunter il virus.

Purtret d'ina antilopa da saiga.
Legenda: L'antilopa da saiga è sin buna via da sa revegnir. naturschutz.ch

L'emprima giada dapi 30 onns han ins puspè vesì in Vietnam-Kantschil. L'animal cun ungla tutga tar la famiglia dal purschè da tschierv. En l'ost dal Vietnam è l'animal uss vegnì en ina trapla da camera. Quants dals animals che vivan en la regiun n'è anc betg cler. L'ultim dals animals aveva in chatschader sajettà il 1990.

Purtret dal vietnam-kalantschil.
Legenda: Il Vietnam-Kantschil è puspè vegnì fotografà suenter ch'el era svanì 30 onns. DPA

Ord l'archiv:

RTR novitads 10:00

Artitgels legids il pli savens

Ir a sanester Ir a dretg