Surtut dunnas e giuvnas sajan expostas a violaziuns da massa zunt brutalas. Oravant tut truppas da la regenza, ma er rebels, attatgan civilists, sblundregian, violeschan ed assassineschan innocents. Quai resorta d'in rapport da l’Autcumissariat da l'ONU per dretgs umans a Genevra.
Passa 1300 violaziuns entaifer tschintg mais
Tenor quest rapport ha i dà almain 1300 violaziuns entaifer tschintg mais en il stadi Unity en sid dal Sudan. Er uffants sajan pertutgads. Dapi l'entschatta da la guerra hajan passa 700 uffants patì da violaziuns - ils pli giuvens tranter els n'avevan strusch nov onns.
Violaziuns da massa
Savens dettian entiras rotschas a dies a las dunnas. Ils malfatgs sajan da taxar sco crims da guerra perquai ch'els vegnian savens commess sistematicamain e sa drizzian envers tschertas gruppas etnicas. I sa tracti d'ina da las mendras situaziuns da dretgs umans da l'entir mund. Ma la cuminanza internaziunala na fetschia strusch stim da questa catastrofa.