A Hongkong cuntinueschan las confruntaziuns tranter demonstrants e la polizia. Tar l'universitad politecnica è la situaziun escalada la notg passada. Davant l'universitad che vegn occupada da demonstrants, hai dà in grond incendi. Quel è rut ora suenter che demonstrants han bittà molotows per tegnair davent la polizia da l'universitad.
Cura che la polizia a duvrà gas lacrimogen ha ina part dals demonstrants pudì fugir. Auters èn sa retratgs en l'universitad. Il glindesdi en damaun han demonstrants lura puspè cumenzà a bloccar vias. Blera polizia è preschenta e quella smanatscha da duvrar muniziun ferma, sch'ils demonstrants cuntinueschian cun acziuns privlusas.
Dus morts en quest mais
A Hongkong datti dapi mais protests da massa. L'emprim sa drizzavan quels cunter ina lescha planisada che avess lubì extradizuns en il territori da terra ferma da la China. Entant pretendan ils demonstrants refurmas democraticas fundamentalas e la relaschada da la regenza pro-chinaisa. Ils protests revolvan adina puspè en violenza, quest mais èn gia mortas duas persunas.
RR novitads 06:00