Siglir tar il cuntegn
Inhalt

Exteriur Violenza tar demonstraziuns cunter Trump

Gia il terz di en roda han millis persunas protestà cunter Trump en diversas citads. A Portland en l'Oregon haja dà charplinas tranter ils demonstrants e la polizia, rapportan diversas agenturas da novitads. I saja tranter auter er vegnì sajettà enturn.

Protestas a Portland en l'Oregon - persunas fugian dal gas lacrimogen.
Legenda: A Portland en l'Oregan èn las protestas escaladas. La polizia ha duvrà gas lacrimogen. Keystone

Tar ina dispita tranter in demonstrant ed in automobilist haja l'automobilist tuttenina sajettà pliras giadas sin il demonstrant, communitgescha la polizia.
Demonstraziuns ha i tranter auter er dà a Miami, Atlanta, Philadelphia, New York e San Francisco. A Miami han tschients persunas bloccà ina via directa. A New York èn ils demonstrants sa radunads davant l'uschenumnà 'Trump Tower', la sedia actuala da Trump. Ils ultims dis ha i adina puspè dà charplinas tranter demonstrants e la polizia. A Portland eran las protestas gia escaladas il di avant.

Demos sur fin d'emna

Er per questa fin d'emna èn planisadas protestas, tranter auter a New York ed a Los Angeles. Ils organisaturs da las demonstraziuns han laschà savair ch'els possian anc ditg. Ils 20 da schaner duai dar ina demonstraziun anc pli gronda. Lura vegn Trump numnadamain introducì en uffizi. In di pli tard, ils 21 da schaner, è annunziada ina demonstraziun gronda da dunnas a Washington. Dieschmillis dunnas vulan far part al «Million Women March».

RR novitads 10:00+