Suenter l'inscunter cun Putin a Helsinki aveva il president american, Donald Trump declerà ch'el veglia s'inscuntrar quest atun cun il schef dal Kreml, Wladimir Putin. Trump era vegnì crititgà fermamain per sia conferenza da medias communabla cun Putin. Il president russ aveva dementì d'avair influenzà las elecziuns per il presidi american, il 2016.
Trump aveva numnà il dementi da Trump «extrem ferm ed energic» ed ha cun quai piglià posiziun cunter la valitaziun dals servetschs secrets americans. Quels èn persvas da quai che la Russia saja sa maschadada. Per quai è Trump vegnì crititgà fermamain. Pliras giadas ha Trump sinaquai curregì sias expressiuns u ch'el ha dementì quellas.
In investigader spezial ha examinà sche la Russia è sa maschadada en il cumbat electoral per il presidi american il 2016. El ha era examinà sch'i haja dà cunvegnas tranter il team da Trump e Moscau. Trump ha adina puspè numnà questas examinaziuns ina persecuziun nungiustifitgada.
RR novitads 06:00