Siglir tar il cuntegn

Header

Navigaziun

Siara a Londra, protestas cun binderas e glischs.
Legenda: Fertant ch’il parlament britannic debattescha, vegn protestà ordadora per restar en l’UE. Keystone
cuntegn

Exteriur Votaziun Brexit è spustada

En in pled al parlament britannic haja Theresa May, la primministra da la Gronda Britannia, spustà la votaziun davart la cunvegna dal Brexit scriva l'agentura da novitads SDA. La votaziun era planisada per damaun mardi saira en il parlament britannic.

Il parlament avess stuì decider damaun da la cunvegna che reglescha ils detagls tranter la Gronda Britannia e l'Uniun Europeica per il Brexit, la sortida da la Gronda Britannia da l'UE.

In di avant la votaziun annunzia May da spustar quella

Uss, in di avant, para la primministra Theresa May dad avair pers il curaschi ed ha annunzià da vulair spustar la votaziun. En ses pled en il parlament è May sa mussada persvadida ch'ils deputads e las deputadas avessan refusà il contract cun gronda maioritad.

L'idea da May è da far negoziaziuns supplementaras cun l'UE. Da Brüssel vegn dentant ina clera refusa da quest'idea: I na dettia naginas negoziaziuns supplementaras dal contract, uschia il president dal cussegl da l'UE, Donald Tusk.

UE: Discutar bain, dentant senza la Gronda Britannia

La gievgia è previs a Brüssel in inscunter suprem tranter ils 27 commembers da l'UE – senza la Gronda Britannia ch'è actualmain anc il 28avel commember. En ina reacziun sin il spustament da la votaziun en il parlament a Londra ha Tusk annunzià da midar la glista da tractandas e da discutar l'emprim di dal Brexit.

RR novitads 20:00