Duas emnas suenter l'erupziun d'in vulcan en Nova Zelanda han las autoritads chalà da tschertgar per survivents sin l'insla White Island. Duas persunas èn anc sparidas. Quai ha communitgà il schef da la polizia Andy McGregor. La tschertga intensiva d'enfin uss, sin terra sco era en l'aua, saja stada senza success.
17 morts, 2 sparids
Entras l'erupziun dal vulcan èn mortas 17 persunas. Las autoritads localas van dentant da quai ora ch'era ils dus sparids – ina giuvenila da l'Australia ed in guid – èn vegnids per la vita e lur baras èn probablamain vegnidas tratgas en la mar.
Tozzels da persunas èn stadas ils 9 da december sin l'insla vulcanica White Island cura ch'il vulcan è erut. Anc adina vegnan 13 persunas tractadas en ospitals pervi da lur nauschas arsentadas. 13 pazients èn vegnids sgulads en l'Australia.
RTR novitads 06:00