Volkswagen ha divers problems. La marca principala VW na fa prest pli gudogn, temas da l’avegnir èn vegnids prendids per mauns pir tard ed il scandal dad emissiuns ha cumplitgà l’entira situaziun.
Plan radical: Stritgar 30'000 plazzas, 23'000 da quellas en Germania
Il president da Volkswagen, Herbert Diess, ha presentà a Wolfsburg il plan per l’avegnir dal concern. Quel prevesa il tagl da 30’000 plazzas da lavur, 23’000 da quellas sulettamain in Germania. Il plan è resultà dad in accord cun il cussegl da fabrica.
Il concern dad autos vegn ad investir 3,5 milliardas euro en l’electromobilitad ed en la digitalisaziun, cun 9’000 plazzas da lavur novas en il sectur software. «Nus restructurain VW da maniera radicala per render pront il concern al grond midament cun quel ch’il sectur dad autos vegn ad avair da far.» ha affirmà Diess.
Spargnar 3,7 milliardas euro
Cun las mesiras cuntegnidas en l’accord vul VW meglierar il resultat operativ fin al 2020 per 3,7 milliardas euro.
Quai fa VW tenor la gasetta Handelsblatt cun spargnar trais milliardas tar ils stabiliments tudestgs e 700 milliuns tar quels en l’exteriur. Tut la gruppa Volkswagen occupa 624’000 persunas, 282’000 dad ellas en Germania.
«La pli gronda refurma en l'istorgia da VW»
«Il plan per l’avegnir è il pli grond program da refurma en l’istorgia da Volkswagen» e vegn a render l’interpraisa «pli effizienta, productiva e cumpetitiva» ha ditg il numer in da la gruppa, Matthias Müller, en la conferenza da medias a Wolfsburg. L’accord chattà cun il sindicat vegn a permetter a VW da dar gas tar «l’electromobilitad, la digitalisaziun e la colliaziun».
La meglra soluziun da duas nauschas
«Cun l’accord per l’avegnir è vegnida evitada ina restructuraziun na controllada da VW», ha affirmà il schef dal cussegl da fabrica, Bernd Osterloh.
Il mantegniment da la lavur a lunga vista possia mo vegnir segirà cun ina basa solida da l’interpraisa.
«Volkswagen è en ina situaziun difficila», ha Osterloh admess e rendì attent a l’impurtanza dals mecanissems socials sco il prepensiunament progressiv.
Dar gas tar l'electromobilitad
«Da sa drizzar vers l’electromobilitad vegn a permetter da sviluppar il autos electrics en ils stabiliments tudestgs» ha concludì il sindicalist suprem.
El è sa mussà persvadì che la decisiun per l’electromobilitad vegn a garantir novas plazzas da lavur e che VW vegn ad esser protagonist da las transfurmaziuns ch’han tschiffà il mund dals autos.
RR novitads 09:00+