Siglir tar il cuntegn

Exteriur WADA examinescha problems cun buttiglias da prova

Curt avant ils gieus olimpics a Pyeongchang procura l'agentura mundiala anti doping per malsegirtad. Las novas buttiglias da prova d'urin na sajan eventualmain betg segiras avunda.

Buttiglias da l'interpraisa svizra Berlinger per las provas da doping.
Legenda: Talas buttiglias da l'interpresa svizra Berlinger vegnan duvradas per las provas da doping. Ellas duain impedir manipulaziuns secretas. Keystone

Buttiglias possian tut tenor vegnir avertas senza laschar enavos fastizs. Quai ha il labor d'analisa a Cologna en Germania annunzià a l'agentura mundiala anti doping WADA. Quai sch'ins schelentia las provas. L'agentura anti-doping mundiala sincerescha dentant ch'ins vegnia ad intercurir il cas e sclerir il problem cun l'interpresa svizra Berlinger, la producenta da las buttiglias da prova.

Gia a Sotchi avevi dà problems

La segirtad da la buttiglias è gia stada in tema als gieus olimpics a Sotchi avant quatter onns. Là era vegnì enconuschent che las provas d'atlets russ eran vegnidas manipuladas cun agid dal servetsch secret russ.

Tar ina controlla da doping vegnan duvradas duas buttiglias, mintgamai ina per la prova A ed ina per la prova B. La segunda prova vegn lura schelentada e mo duvrada sche l'atlet controllà metta en dumonda il resultat da l’emprima prova.

RR novitads 11:00