Il president chinais Xi Jinping vegn era a far ina visita uffiziala da la Svizra la dumengia avant il WEF. Ulteriuras visitas fa la delegaziun chinaisa era tar las Naziuns Unidas a Genevra, tar l’Organisaziun mundiala da la sanadad WHO e tar il Comité olimpic internaziunal.
Donald Trump absent, dentant in dals temas
Il Forum mundial d’economia ha lieu dals 17 fin ils 20 da schaner cun il motto ‘Manar cun s’adattar e cun responsabladad’ (Responsive and Responsible Leadership). Quai ha annunzià il fundatur dal WEF Klaus Schwab. Il motto stat en connex cun ils success che populists sco il futur president american Donald Trump han gì tar elecziuns ils davos mais. Durant ch’il WEF ha lieu vegn Trump a surpigliar ils 20 da schaner ses uffizi a Washington.
Era sche Donald Trump n'è betg al WEF, trametta el in represchentant. Anc en uffizi èn il vicepresident dals Stadis Unids Joe Biden ed il minister da l’exteriur John Kerry. Els dus passentan lur ultims dis en uffizi al Forum mundial d’economia.
Regenza svizra e grischuna, ed intgins retgs e reginas
Ils cussegliers federals èn era da la partida al 47avel Forum mundial d’economia. L’unica che manca è Simonetta Sommaruga. Per la paja è la regenza grischuna cumpletta. In di u l’auter èn tuts d’inscuntrar a Tavau.
Giasts a Tavau èn era divers retgs e reginas. Per exempel la regina ollandaisa Máxima, il retg da la Jordania Abdullah II e la ragina Rania. Da la Belgia vegnan il pèr Philippe e Mathilde, sco era da la Norvegia il pèr ereditar Mette-Marit e Haakon.
Uschè blers a Tavau sco anc mai
Il 47avel Forum mundial d’economia a Tavau spetga radund 3’000 participants e participantas, uschè bleras sco anc mai. Ils organisaturs spetgan era il nov secretari general da l’ONU António Guterres, la prima ministra da la gronda britania Theresa May e il ministers tudestgs sco Wolfgang Schäuble ed Ursula von der Leyen. Preschents èn era la chantadura Shakira ed il actur Matt Damon.
La chanceliera tudestga Angela Merkel manca dentant il segund onn en successiun. Betg preschents èn era il president franzos François Hollande ed il schef da regenza dal Canada Justin Trudeau.
RR novitads 15:00