Ils whistle-blowers – persunas che fan attent sin situaziuns insupportablas en lur firmas u organisaziuns - duain survegnir protecziun giuridica en l'Uniun europeica. Il parlament da l'UE ha decis directivas davart ils dretgs da whistle-blowers. Tgi che gida per exempel da scuvrir cugliunarias, corrupziun u polluziun da l'ambient duai esser protegì tras la lescha – per exempel sche la persuna sto temair da perder la plazza.
Il cussegl dals pajas commembers sto uss anc approvar per furma la directiva e silsuenter ston ils pajais adattar lur leschas per pudair proteger whistle-blowers.
Proceder en trais pass
La directiva prevesa in proceder en trais pass. Infurmants duain sco emprim instruir in post intern da la firma u organisaziun davart situaziuns insupportablas. Na gida quai nagut, duai sco proxim in post public vegnir contactà. Pir sco terz pass, pon infurmants lura sa drizzar a la publicitad. En cas excepziunals èn infurmants dentant er protegids, sch'els na sa tegnan betg vi da quest proceder.
RR novitads 15:00