Siglir tar il cuntegn

Header

cuntegn

Exteriur WHO dat ora novas directivas pertutgant cancer

Il motiv per las novas directivas è per che pertutgads survegnian pli baud ina diagnosa e per che las schanzas da guarir sa megliuran.

Per che las schanzas da medegiar s'augmentian ha la WHO relaschà las novas directivas. Ella cusseglia trais chaussas:

  • Autoritads duain infurmar meglier davart sintoms da las differentas sorts da cancer.
  • Medis e tgirunzs duain vegnir scolads meglier per ch'els possian tschentar diagnosas pli exactas.
  • Pazients duain survegnir sin l'entir mund la dretga terapia, senza ch'els vegnian ruinads.

Sch'il cancer vegnia chattà e diagnostitgà memia tard ed ils pazients survegnan betg il dretg tractament sche pateschian els nunnecessariamain e moran savens pli baud che necessari, di Etienne Krug, il directur da la WHO. Las mesiras duain sur tut pussibilità che cancer dal sain, da l'uterus e da la beglia vegnia chatta pli baud.

La diagnosa ad uras fetschia era finanzialmain senn. Uschia saja il tractament pli bunmartgà e bleras persunas possian lavurar vinavant.

Chaschun per mintga sisavla mort

L'onn 2010 hajan malsognas da cancer chaschuna custs da passa in billiun euros sin l'entir mund. Quai entras custs da tractament ed entras perditas da producziun.

Almain 14 milliuns persunas daventan malsaunas mintg'onn da cancer. Enfin l'onn 2030 duai quest dumber anc crescher sin 21 milliuns, annunzia la WHO. Cancer è la chaschun da murir tar mintga sisavel. Tenor la WHO moran mintg'onn 8,8 milliuns persunas pervi da cancer.

RR novitads 09:00

Artitgels legids il pli savens