Il secretari general da l'ONU, António Guterres ed il schef da l’Organisaziun mundiala da la sanadad WHO, Tedros Ghebreyesus, han nizzegià la chaschun ed appellà da reparter il vaccin da Covid-19 pli gist sin l’entir mund. L'uschenumnà «naziunalissem da vaccinar» saja in privel per tut ils umans, uschia Guterres. La repartiziun malgista dal vaccin saja responsabla per dapli mortoris, dapli sistems da sanadad ruinads ed er per dapli malgiustia economica.
La pandemia vegn ad ir a fin cura ch'il mund decida da finir ella.
Tenor Ghebreyesus saja anc adina pussaivel da cuntanscher la finamira da la WHO, da numnadamain vaccinar almain 40% da la populaziun da tut ils pajais sin il mund fin la fin da quest onn. Pajais ch’hajan ina pli auta quota duajan uss star enavos e laschar la precedenza al program da vaccinar da la ONU Covax u a l’iniziativa africana Avat, uschia Ghebreyesus.
L'inscunter suprem davart la sanadad cuzza anc enfin mardi.