Zagreb: Polizia chatta 67 umans en in camiun

En la Croazia ha la polizia chattà en in camiun cun numers brits 67 persunas serradas en. Quai rapportan medias a Zagreb sa referind sin indicaziuns da las autoritads.

Ina porta dad ina auto da polizia. Bild in Lightbox öffnen.

Legenda da maletgs: La polizia croata ha salvà la notg sin dumengia 67 fugitivs or dad in transporter pitschen. Keystone

Las 67 persunas dal Pakistan ed Afghanistan eran squitschadas en sin 10 meters quadrats en in transporter pitschen. La camiunetta era crudada si ad ina patruglia da polizia la sonda saira sin l’autostrada var 100 km en il sid-ost da la chapitala da Zagreb.

Bleras da las persunas serradas en, tranter quellas er uffants, eran senza schientscha. Quai pertge ch’ellas avevan respirà monoxid carbonic e pertge ch’ellas eran sfradentadas. Ellas èn vegnidas purtadas a l’ospital.

Ils dus manischunz bulgars èn suenter ina curta fugia vegnids tschiffads da la polizia. Sch'ils 67 migrants èn sa revegnids duajan els vegnir purtads enavos en Serbia.

L’onn passà eran vegnids passa in milliun persunas sur la uschenumnada ruta dal Balcan da la Grezia via la Macedonia, Serbia, Croazia e Slovenia en Austria e surtut en Germania. Il mars passà era la ruta vegnida serrada cun saivs e quai en emprima lingia da la Macedonia. Tenor l’autoritad per la protecziun dals cunfins Frontex sajan tuttina arrivadas quest onn 180’000 persunas sur questa ruta da transit en l’Europa dal Vest.

RR novitads 15:00